काठमाडौ, १३ मंसिर । मंसिर ४ गते सम्पन्न दोस्रो संविधानसभा निर्वाचनको समानुपातिक तर्फको मतगणना विहिवार सकिएको छ । २ सय ४० क्षेत्रको जम्मा ९४ लाख १९ हजार ३ सय ३९ सदर मत मध्ये नेपाली कांग्रेसले सवै भन्दा बढी २४ लाख १७ हजार ११ मत प्राप्त गरेको छ भने दोस्रो स्थानमा रहेको नेकपा एमालले २२ लाख ३९ हजार १ सय ७४ मत प्राप्त गरेको छ ।
प्रत्यक्ष तर्फ तेस्रो स्थानमा रहेको एकिकृत माओवादीको समानुपातिक तर्फ पनि तेस्रो स्थानकै परिणाम आएको छ । एमाओवादीले १४ लाख ३४ हजार ९ सय २३ मत प्राप्त गरेको छ ।
प्रत्यक्ष तर्फ कुनै पनि सिट नजितेको हिन्दु राज्य र राजतन्त्रको वकालत गर्दै आएको दल राप्रपा नेपाल भने समानुपातिक तर्फ चौथो स्थानमा रहँदै ६ लाख २१ हजार १ सय ५९ मत प्राप्त गरेको छ । समानुपातिकका लागि निर्वाचन आयोगमा दर्ता भएका १ सय २२ दल मध्ये झण्डै ३२ दलले संविधानसभामा प्रतिनिधित्व गर्न पाउने भएको छ । निर्वाचन आयोगले भने दलहरुको संख्या निश्चित गरिसकेको छैन ।